Ғылым

Әлем әдебиеті: қызықты 7 кітап

Әлем әдебиетінен қандай қызықты романдар оқуға болады?

ХАЛЕД ХОССЕЙНИ «БАТПЫРАУЫҚ ҚУҒАН БАЛА»

Түпнұсқадағы атауы: «The Kite Runner»

Романның негізгі тіні — Әмір мен Хасеннің тағдыры. Батпырауық қуып жарысқан Әмір мен Хасеннің тағдыры да жел ұшырған батпырауықтай заманның аласапыранымен әр тарапта әрқилы жалғасты. Романда тек осы екеуінің ғана емес, пуштун мен хазардың, үстем тап пен қараша халықтың, тәліптері бар, басқа да саяси-әскери төңкерістерді бастан кешкен Ауғанстанның қасіреті баяндалған.

ОРХАН ПАМУК «МЕНІҢ АТЫМ ҚЫРМЫЗЫ»

Түпнұсқадағы атауы: «Benim Adım Kırmızı»

Автор отырықшы түркілер мен көшпенділердің дүниетанымындағы айырмашылықты сурет өнерін сипаттай отырып, әдемі баяндайды. Роман осындай ерекше стилімен есте қалары анық. Өлілердің, иттің, ағаштың атынан сөйлеу арқылы оқиға желісін шиеленістіріп, оқырманды шығармадағы қылмыскердің кім екендігін табуға жетелейді.

ХАРУКИ МУРАКАМИ «НОРВЕГ ОРМАНЫ»

Түпнұсқадағы атауы: «ノルウェイの森»

1960 жылдар. Токиода жапон студенттері бүкіл әлем студенттерімен бірге жүйеге қарсы шығып жатқан кезең. Романда студент Тоору Ватанабэнің екі қызбен ара-қатынасы баяндалады. Бірінші қыздың психикалық ақауы бар, интроверт. Екінші қыз ақжарқын, көңілді қыз. Кітап атауы Битлз тобының «Norwegian Wood» әніне байланысты қойылған.

ФРЕДРИК БАКМАН «МАЗАСЫЗ АДАМДАР»

Түпнұсқадағы атауы: «Folk med ångest»

Шағын швед қалашығында тапаншамен қаруланған адам сегіз тұрғынды кепілге алады. Сенсацияға құмар тілшілер тобы есіктің алдына жиналып үлгереді, полиция да ішке кірудің барлық жолын қарастыруда. Осы кезде кепілге алынған адамдар өзара өздерінің терең сырларымен бөлісе бастайды. Қарақшы бұл мазасыз адамдармен бірге бір жерде қамалып отырғанша, полицияға берілген артық деп ойлайды.

БЕРНАР ВЕРБЕР «ПЕРІШТЕЛЕР ИМПЕРИЯСЫ»

Түпнұсқадағы атауы: «L’Empire des anges»

Мишель Пэнсон жұмаққа барады. Ол үш бас періште басқаратын «соңғы сотқа» тап болады. Адам үшін ең қорқынышты сынақ – реинкарнация. Оны бұдан қорғаушы періште Эмиль Золя аман алып қалады. Енді Мишельдің алдында таңдау тұр: не періште болу керек немесе жерге барып пайғамбарлық қызмет атқару керек.

ДЖОН ФАУЛЗ «КОЛЛЕКЦИЯ ЖИЮШЫ»

Түпнұсқадағы атауы: «The Collector»

Адамдармен тіл табысуға қиналатын Фредерик Клегг есімді жігіт көбелектердің коллекциясын жинауды ермек етеді. Бірде ол Миранда дейтін қызға ғашық боп қалады. Миранданың да өз коллекциясы ішінде болғанын қалайды. Сөйтіп ол қызды ұрлап кетеді. Миранда суретші қыз, ол өнерді сүйеді. Романның екінші бөлігі қыздың күнделігінен тұрады.

АНТУАН ДЕ СЕНТ-ЭКЗЮПЕРИ «ҚАМАЛ»

Түпнұсқадағы атауы: Citadelle

«Қамал» – Экзюперидің ерекше әрі ұлы шығармасы боп саналады. Бұл шығармада негізінен Библияға, Құранға, Ницше, Блез Паскаль, Рене Декарт кітаптарына, антикалық дәуір философтарына сілтеме көп жасалған. Маркетингтік жіктеу тұрғысынан «Қамал»  интеллектуалды бестселлерлер санатына кіреді.

Ұқсас мақалалар

Пікір үстеу

Back to top button