Қазақ мектептерінде оқытылып жатқан ағылшын тілі пәнінің оқулықтары қазақтың танымы мен дәстүріне, идеологиясына қарсы. Қазақ халқын мазақ етудің көрінісі. Осылай дейді ақын, «Nur Otan» партиясы фракциясының мүшесі Мақпал Мыса.
«Мына оқулықтар – қазақ мектептеріндегі ағылшын тілін оқытуға арналған оқулықтар. ҚР Білім және Ғылым министрлігі сараптамасының оң қорытындысын алып оқыту бағдарламасына енгізілген.
Кітап Қазақстан мектептері үшін даярланса да, аударма нұсқада. Суреттерден көріп отырғандарыңыздай, екі-үш мемлекеттің туымен, сол елдерге тән ерекшеліктермен қойылған суреттерде өз елінде өгейлік көргендей, Қазақстан үнемі ең соңында, төменгі жағына орналастырылған», – дейді Мақпал Мыса.
Тағы бір мәселе, кітаптардың өн бойында қазақ балаларының келбеті бұрмаланып, сайқымазақ сияқты салынғаны несі деген сұрақ туындайды. Бір жерінде тұлымын желбіретіп, басын тақырлап салса, енді бірде ернін бояп қояды, енді бірде қазақы көйлектегі ұл бейнесінде береді.
Екінші сыныпқа арналған оқулықта қазақтың ұлттық тағамы ретінде лағманды көрсетсе, ұлттық дәстүріміздің ішінде пасха мен масленница неге жүр?
«Бұл енді шектен шыққандық!
Адамның дене мүшелерін таныстырғанда, жалбыраған шашты ұсқынсыз суреттен шошып та кетесің.
Кітаптың өне-бойында бала ұғымына, психологиясына кері әсер ететін, қазақтың ұлттық ұғымына, дәстүрлі тәрбиесіне келмейтін, шет елдің идеологиясын насихаттайтын иллюстрациялар мен мәтіндерді көптеп кездестіруге болады. Осылайша, тере берсең шыға береді», – дейді Мақпал Мыса.
Сондықтан, оқулықтарды сараптамадан өткізгенде, оны бекіткенде, баспаға жіберер алдында ең алдымен Қазақстанның болашағына жауап беретін, ұлттық ұстыны мықты, өз Отанын аса қадірлейтін ұрпақ тәрбиелеу үшін не қажет деген сауалды бірінші орынға шығарған дұрыс деп есептеймін!
«Бұл мәселені кешенді түрде бақылауға алатынымды мәлімдеймін», – деп сөзін аяқтады Мақпал Мыса.
