Сібір жазығының оңтүстік жағынан осыдан 3000 жыл бұрын жерленген сақ қорғандары табылды. Енді Ресей басшылығы сақ жауынгерінің әскери өнерін тану үшін қабірде жатқан мәйіттерді тірілтіп, клон жасауды қолға алмақ. Мұны Ұлыбританияның The Sun басылымы жазды.
Скиф сарбазының мәйітін қалпына келтіруді ұсынған – РФ президенті В.Путиннің жақсы досы, серіктесі қазіргі Қорғаныс министрі Сергей Шойгу.
Ал қорғанның өзі Тува Республикасынан, тоба хандары жатқан аңғардан табылған. Археологиялық қазба жұмыстары осыдан 3 жыл бұрын басталған. Ғалымдар патшалар қорғанынан сақ жауынгерлерінің мұздатылып жерленген мәйіті мен жылқыларын тауып, орыс және швед ғалымдары қызу зерттеуге кірісіп кетті.
Аталмыш археологиялық нысанды көруге келген Шойгу Орыс географиялық қоғамы отырысында сақ жауынгерлерін тірілту мен оны мәңгі сақтап қалудың жолын табуды ұсынды.
«ДНК-ны сақтап қалатын органиканы тапсақ, жақсы болар еді. Долли қойы сияқты тірілтіп, соған ұқсас дүние жасау керек», – деген Шойгу отырыста.
Долли қойы дегеніміз – 1996 жылы Шотландияда клон арқылы ұрықтандырылып туылған сүтқоректі. Кәдімгі тірі жануар сияқты, төрт рет қоздап, 2003 жылы ауырып өледі.
Ғалымдардың айтуынша, дәл осы клондау әдісін қолдану арқылы сақ обасында жатқан ежелгі жауынгерлердің мәйітін қалпына келтіріп, өмір бақи сақталып қалатындай формасын жасауға болады.
Қазір ғалымдар жауынгер мәйіттің қалдықтарын мұқият зерттеп, клондауға мүмкіндік берер генетикалық материал іздеп жатыр.
Ағылшын басылымы «Ресей әскери өкілдері сақ жауынгерлерін тірілтіп, әскери қызметке жаратпақ» дейді.
Клондау деген не?
Клондау дегеніміз – тірі жануардың жасушасын (өлген жануардан да алуға болады, бірақ онда органикалық материалы сақталып қалса) алып, ядролық ДНК құрылымын құрастыруды айтады. Сөйтіп бір биологиялық түрдің бүкіл ДНК-сын құрастырып шығуға болады. Кейін жасуша жұмыртқасын электрлі шокермен ұрады да, содан жасуша бөліне бастайды. Дәл осыны жасушаны әкеп суррогат ананың жатырына салады.
